Fullt var út úr dyrum á fundi á Vitanum í Sandgerði í fyrrakvöld þar sem fjallað var um helstu álitamál í íslenskum sjávarútvegi. Að sögn staðarhaldara var um að ræða fjölmennasta fund sem haldinn hefur verið í húsakynnum Vitans.  Frummælendur á fundinum voru Grétar Mar Jónsson skipstjóri og fyrrverandi þingmaður, Finnbogi Vikar laganemi, Lúðvík E. Kaaber hæstaréttarlögmaður og Jón Gunnar Björgvinsson flugmaður og sjómaður.  Allir gagnrýndu þeir kvótakerfið og bentu á nauðsyn tafarlausra breytinga.  Í upphafi fundarins var Ásmundi Jóhannssyni, baráttumanni úr Sandgerð, sem lést á dögunum, vottuð sérstök virðing.  Mál hans átti að taka fyrir í héraðsdómi í vikunni en honum voru gefnar að sök ólöglegar veiðar.

 

Tíðindamaður skutuls.is, sem var á fundinum segir að í erindum framsögumanna hafi hræðsluáróðri LÍÚ verið svarað fullum hjálsi.  Af fundinum er ljóst að það er gríðarlegur hugur í mönnum fyrir þá baráttu sem fram undan er. Fundarmenn sammæltust um þá kröfu að kvótinn yrði innkallaður, en á mun skemmri tíma en stjórnvöld hyggjast gefa sér, þ.e. krafan er um tafarlausa 100% innköllun.  Krafan er sú að mannréttindabrot á íslenskum sjómönnum verði nú þegar stöðvuð. Í því samhengi var á það minnst að margir sitjandi þingmenn hefðu mótmælt mannréttindabrotum í fjarlægum löndum, en hinir sömu menn steinþegja yfir mannréttindabrotum á íslenskri grundu.

Lúðvík Kaaber rakti það hvernig atvinnufrelsisákvæði stjórnarskrárinnar sem á að tryggja réttindi sem menn út um alla Evrópu gáfu líf sitt fyrir að tryggja á 19. öld væru nú fótum troðin á ný tæpum 200 árum seinna til að tryggja réttindi hóps manna til að einoka heila atvinnugrein. Það var einmitt það sem atvinnufrelsisákvæðinu var ætlað að koma í veg fyrir: að menn gætu einokað heilar atvinnugreinar líkt og verið hafði víðs vegar í Evrópu allt fram á 19. öldina. Gegn slíku oki voru háð stríð þar sem margir létu lífið fyrr á öldum. Eftir fundinn var hreint ótrúlegt að sjá þegar hver fundargesturinn á fætur öðrum kom og faðmaði frummælendur í þakklætisskyni fyrir fundinn.  Áætlanir eru uppi um fleiri fundi af þessu tagi.

Frétt af fundinum birtist á dv.is í gær.

Deila á Facebook