Hraðfrystihúsið Gunnvör hefur sótt um leyfi til að byggja upp samtals sjö þúsund tonna fiskeldi á nokkrum stöðum innarlega í Ísafjarðardjúpi. Hingað til hefur Gunnvör mest náð að framleiða eitt þúsund tonn af þorski á ári. Bæta á við laxi og regnbogasilungi. Áform HG um stórfellda uppbyggingu í fiskeldi er til umfjöllunar hjá Umhverfisstofnun og Skipulagsstofnun og til umsagnar hjá þremur sveitarfélögum við Ísafjarðardjúp, Ísafjarðarbæ, Súðavíkurhreppi og Strandabyggð.  Í Fréttablaðinu segir að almennt virðist viðhorfið jákvætt til málsins, en því hafi engu að síður verið vísað í umhverfismat.

HG hf. hefur í allmörg ár rekið fiskeldi í Álftafirði, Seyðisfirði og Skötufirði í Súðavíkurhreppi. Fyrirtækið hefur mest náð að framleiða um eitt þúsund tonn af þorski, mest í áframeldi, en hefur leyfi til eldis á tvö þúsund tonnum. Með því að fá heimild til að framleiða allt að sjö þúsund tonnum á útvíkkuðu starfssvæði má segja að stefnt sé að því að sjöfalda framleiðsluna. Haft er eftir Einari Val Kristjánssyni í Fréttablaðinu að þróunin í tilraunaeldi á þorski sem staðið hafi í tíu ár hafi gengið hægar en menn væntu. Því vilji menn styrkja eldisþátt fyrirtækisins með eldi á laxi og regnbogasilungi sem sé einfaldari framleiðsla. „Við erum með eldisbúnaðinn, fólkið, skipin og sláturhús þannig að við erum með alla grunngerðina," segir Einar Valur.

Deila á Facebook