Magnús Reynir Guðmundsson hyggst leggja fram tillögu í bæjarstjórn Ísafjarðarbæjar um að byggðamerki Ísafjarðarbæjar verði aðeins eitt og það verði gamla merki Ísafjarðarkaupstaðar.  Magnús Reynir lagði málið fyrir í bæjarráði síðasta mánudag.  „Það hefur vakið mikla athygli að Ísafjarðarbær er með fjögur skjaldarmerki, en ekki eitt, líkt og flest önnur sveitarfélög,“ segir Magnús Reynir í viðtali við skutul.is.  Lengi hefur verið rætt um byggðamerki fyrir Ísafjarðarbæ og meðal annars var haldin samkeppni um nýtt merki árið 2007, en dómnefnd hafnaði öllum tillögum sem fram komu.  Magnús Reynir hefur oft vakið máls á þessu í bæjarstjórn og telur að nú sé kominn tími til að komast til botns í málinu, fyrir næstu bæjarstjórnarkosningar.

Deila á Facebook