Núverandi kvótakerfi hefur þjónað Reykjavík best. Aflahlutdeild Reykjavíkur hefur aukist um 86% frá því frjálst framsal kvóta var leitt í lög árið 1991. Þá var aflahlutdeild útgerða í Reykjavík 7,7% en var á síðasta fiskveiðiári 14,4%. Aflahlutdeild Reykjavíkur var 44.000 þorskígildistonn fiskveiðiárið 2010/2011. Þetta þýðir að kvóti Reykvíkinga er 20 þúsund þorskígildistonnum meiri, en hann hefði verið árið 1991. Það er mesta aukning í einu sveitarfélagi frá þeim tíma. Önnur sveitarfélög sem hafa bætt verulega við sig kvóta eru Grindavík, Snæfellsbær og Skagafjörður. Þá hafa Akranes, Garður og Grenivík einnig bætt við sig aflahlutdeild frá 1991. Þeir sem tapað hafa á kvótakerfinu frá 1991-2011 eru Vestfirðir, mest byggðarlög í Ísafjarðarbæ, en einnig Bíldudalur, Hólmavík, Drangsnes og Súðavík. Þá hefur Fjarðabyggð fyrir austan, Sandgerði, Keflavík og Vopnafjörður tapað stórum hluta af sínum kvóta frá 1991. Hlutdeild Akureyrar minnkaði, mest við söluna á ÚA, en hlutdeild Dalvíkur hefur aukist á móti frá 1991-2011.

Aflahlutdeild Reykjavíkur, Hafnarfjarðar, Akraness er samtals 22,4%, aflahlutdeild sveitarfélaga á Suðurnesjum er 13,7% og samtals gerir það rúmlega 36% af öllum kvóta á Íslandsmiðum. Hafnir utan höfuðborgarsvæðisins og Suðurnesja ráða yfir 64% kvótans árið 2011. Það hefur vakið eftirtekt að auglýsingar frá útvegsmönnum segja aðra sögu.

Þessar upplýsingar má lesa úr fylgiskjali með frumvarpi Þórs Saari og annarra þingmanna Hreyfingarinnar um breytingar á stjórn fiskveiða. Þar er tafla yfir aflahlutdeild byggðarlaga og sveitarfélaga frá 1991-2011.