Í kvöld og á morgun verður kynning á snjóbyssu TechnoAlpin á Skíðasvæðinu á Tungudal á Ísafirði.  Eins og kunnugt er lánaði fyrirtækið byssuna á svæðið og tveir fulltrúar þess koma í dag til að kynna búnaðinn fyrir heimamönnum.  Kynningin hefst í kvöld um klukkan 20 (mánudag) og stendur yfir allan daginn á morgun (þriðjudag).  Allir áhugamenn eru hvattir til að mæta og kynna sér búnaðinn, sem er ekki eins einfaldur og margir halda, segir í tilkynningu frá upplýsingafulltrúa Ísafjarðarbæjar. 

Snjóbyssur eru til að framleiða snjó. Þær eru hlaðnar með vatni, en skjóta frá sér snjókristöllum. Snjórinn er notaður til að bera í skíðabrekkur, þegar ekki er nóg af honum frá náttúrunnar hendi. Þannig má ná betri nýtingu á skíðalyftum og skíðasvæðum.  Á Akureyri og víðar hefur þetta gefið góða raun og nú er að sjá hvort tækið virkar jafn vel hér á Dalnum.
Deila á Facebook