Aldur.

Ég er 26 ára

Hvaðan ertu?

Hreinræktaður Ísfirðingur, þó ég hafi alveg óvart fæðst í Reykjavík.

Hvar hefur þú átt heima um ævina? Á Ísafirði, í Reykjavík, og í Grindavík

Við hvað hefur þú starfað um ævina?sko..búðarkona, kennari,flokkstjóri,stuðningsfulltrúi,starfsmaður í skammtímavistun, fóstra, pössunarpía, uppvaskari

Hvar varstu um tvítugt og hvað varstu að gera þá? Ég bjó í Reykjavík, vann á leikskóla og þóttist vera að mennta mig!  Við bjuggum saman nokkrar vinkonur í 101 skemmtilegasti tími lífs míns, enn sem komið er allavega.

Hvað finnst þér skemmtilegast að gera?

Mér finnst skemmtilegast að vera með stelpunni minni og vinum, ferðast, borða góðan mat og svo er svolítið gaman að vera með fjölskyldunni minni líka.

Hvað finnst þér leiðinlegast að gera? Ég var heima hjá mér veik um daginn og það er það sem kemur fyrst upp í hugann þegar ég hugsa um eitthvað leiðinlegt..annars er ég alltaf svo jákvæð...

Æskuminning?Við Steini bróðir og Guðni að reyna að kveikja í gömlum dagblöðum í kjallaranum á "kennarablokinni" í Fjarðarstrætinu, ætluðum ekkert að brenna niður húsið eða neitt svoleiðis, bara  prakkarast... löggan kom og allt.  Við gerðum þetta sko aldrei aftur, kerling í blokkinni á móti tók okkur svoleiðis í gegn!! Áttum það líka skilið.

Af hverju býrð þú fyrir vestan? Það er svo ljúft og notarlegt að vera hérna fyrir vestan, vinkonur mínar skilja það ekki en ég gæti ekki hugsað mér að búa nokkur staðar annars staðar en einmitt hérna. Ef ég flytti héða væri til að búa í útlöndum einhvers staðar og á örugglega eftir að gera það í framtíðinni.

Heldurðu að þú búir hér fyrir vestan eftir 10 ár?

Já og nei, það er svo erfitt að spá í 10 ár, það er svo mikið, þá verður dóttir mín orðin 14 ára...uss það er allt of langt þangað til.

Tuttugasti og níundi afmælisdagurinn nálgast óðfluga.

Hvaðan ertu?
Fæddur og uppalinn á Ísafirði, en á einnig ættir að rekja austur á firði.

Hvar hefur þú átt heima um ævina?
Ég hef átti heima á Ísafirði og í Reykjavík.

Við hvað hefur þú starfað um ævina?

Ég hef farið víðan veg. Byrjaði ungur að árum sem blaðburðardrengur og fór þaðan yfir í byggingarvinnu og hellulagnir. Eftir tvítugt hef ég starfað sem kerfisfræðingur, vefsíðusmiður, eldsneytisáfyllingartæknir og lagerstarfsmaður en vinn núna við vefforritun hjá Snerpu.

Hvar varstu um tvítugt og hvað varstu að gera þá?
Þá var ég nýfluttur aftur vestur frá Reykjavík, í óðaönn við að klára stúdentinn og að hefja glæsilegan feril minn í körfubolta.

Hvað finnst þér skemmtilegast að gera?
Einhvað sem inniheldur hreyfingu. Fjallgöngur, ferðalög og vera í góðra vina hóp er þarna efst á lista.

Hvað finnst þér leiðinlegast að gera?
Þurrka rykið úr hillunum.

Æskuminning?
Þegar pabbi þurfti að hjálpa mér, fjögura ára gömlum, yfir snjóskaflinn sem var fyrir framan herbergisdyrnar mínar  eftir að snjóflóð hafði fallið á húsið okkar í janúar 1984. Í minningunni tók ég þessum náttúruhamförum afar karlmannlega þótt aðrir vilji meina að ég hafi grátið eins og lítil smástelpa allan tímann.

Af hverju býrð þú fyrir vestan?
Hér er best að vera, lítið stress og fögur náttúra.

Heldurðu að þú búir hér fyrir vestan eftir 10 ár?
Það er aldrei að vita, framtíðin á eftir að leiða það í ljós.

Fjögurra mánaða

Hvaðan ertu?
Ég er frá Hanhóli í Bolungavík

Hvar hefur þú átt heima um ævina?
Fyrstu níu vikurnar átti ég heima á Hanhóli en síðan hef ég búið í Miðtúni á Ísafirði.

Við hvað hefur þú starfað um ævina?
Ég hef verið duglegur við að læra ýmsa mannasiði - að pissa og kúka utandyra, setjast þegar mér er sagt það, leggjast og bíða. Já svo hef ég verið að læra að gelta eftir skipun. Ég er búinn að sækja eitt björgunarhundanámskeið á Gufuskálum. Þar var ég settur í sigbelti og hífður upp undir rjáfur í einhverri skemmu. Svo var ég dreginn um borð í þyrlu og látinn hnusa þar um allt. Svo var þetta ferlíki sett í gang og ég átti aftur að fara um borð - en þá spyrnti ég nú við fótum og lét ekki bjóða mér meira af svo góðu. Nú svo var ég látinn leita að útlenskri konu sem faldi sig á bak við stein  - og ég fann hana. Fékk að leika við hana alveg helling. Hún vildi láta mig gelta hjá sér - og ég gerð það bara. Þá varð hún voða kát, sagði "gúdd dooog" og ég fékk þá að leika miklu meira. Svaka fjör.

Hvað finnst þér skemmtilegast að gera?
Skemmtilegast er að leika við hana Blíðu, Dalmatíutíkina sem er hér á heimilinu - toga í eyrun á henni og fara í eltingarleik við hana. Svo er rosalega gaman að elta kaðal og bolta í bandi hjá fólki sem felur sig á bak við steina.

Hvað finnst þér leiðinlegast að gera?
Sitja kyrr og bíða. 

Æskuminning?
Einn daginn var ég nýbúinn að fá mér sopann hjá henni mömmu minni og var að leika við systkini mín á bæjarhlaðinu á Hanhóli. Þá kom einhver rauðhærð kona og tvær aðrar konur með henni sem skoðuðu mig og létu mig elta bolta. Svo liðu nokkrir dagar þá kom þessi rauðhærða kona aftur og tók mig með sér. Hún setti mig í bíl og fór með mig heim til sín þar sem ég hef verið síðan. Núna er ég eiginlega alveg búinn að gleyma því að ég hafi átt heima annarsstaðar. 
 

Af hverju býrðu fyrir vestan?
Hvað er "fyrir vestan?"
 

Heldurðu að þú búir hér fyrir vestan eftir 10 ár?
Er til eitthvað annað en fyrir vestan? Hvað eru annars 10 ár?

Ég er 29 ára.

Hvaðan ertu?
Ég er héðan (Ísafirði).

Hvar hefur þú átt heima um ævina?
Ég hef átt heima á Ísafirði alla ævi, fyrir utan nokkra mánuði í Hnífsdal.

Við hvað hefur þú starfað um ævina?
Ég hef unnið í unglingavinnunni fyrir bæinn, við fiskvinnslu í bæði frystihúsinu í Hnífsdal og Íshúsfélaginu, Afgreiðslustörf í Frummynd og undanfarin ár hef ég eingöngu verið að vinna við vefforritun og hönnun. Áður hjá Snerpu en nú hjá Aranea ehf.

Hvar varstu um tvítugt og hvað varstu að gera þá?
Ég var hérna á Ísafirði og nýbuinn að eignast mitt fyrsta barn, hana Eygló Ingu. Þá var ég að vinna í Íshúsfélaginu.

Mig rámar líka í að ég hafi beðið spenntur eftir að komast í ríkið sjálfur í fyrsta skiptið!

Hvað finnst þér skemmtilegast að gera?
Skemmtilegast er að taka ljósmyndir, fíflast með börnin, spila á trommurnar og fá sér nokkra kalda í góðum vinahóp.

Hvað finnst þér leiðinlegast að gera?
Leiðinlegast er án efa að þurfa að horfa á One Tree Hill.

Æskuminning?
Þegar ég var 9 ára, þá eignaðist mér mitt fyrsta BMX hjól og lærði í kjölfarið að hjóla. Það er kannski frekar seint að læra að hjóla 9 ára, en ég hafði bara ekki áhuga á því fyrr en þá. Ég var örugglega búinn að vera að hjóla í nokkrar vikur þegar ég loksins lenti í óhappi. Óhappið lýsti sér þannig að ég hjólaði alveg óvart á stóran stein, datt og lenti með sméttið beint á sviðarhaus sem lá þarna í mölinni!

Þarna fékk ég mitt fræga ör við hægra auga og enn þann dag í dag get ég grobbað mig yfir því að hafa verið bitinn af dauðri rollu.

Af hverju býrð þú fyrir vestan?
Af því að hér er ömurlega gott að vera. Fjöllin, skjólið, fólkið. Yndislegt.

Heldurðu að þú búir hér fyrir vestan eftir 10 ár?
Já, það er alveg vel líklegt.

Aldur: 49 ára

Hvaðan ertu? Ég er fædd í Reykjavík en var send í sveit á sumrin frá fimm ára aldri. Oftast vestur á firði þar sem ég á frændfólk um allar sveitir.

Hvar hefur þú átt heima um ævina? Í Reykjavík til 14 ára aldurs. Þá flutti ég á Ísafjörð og bjóð þar til tvítugs. Flutti þá norður á Húsavík í eitt ár. Eftir það lá leiðin suður til Reykjavíkur í háskólanám þar sem ég bjó til ársins 1996. Þá fluttum við fjölskyldan til Danmerkur. Svo heim aftur og loks á Ísafjörð þar sem við höfum búið frá 2001.

Við hvað hefur þú starfað um ævina? Ég hef verið fiskvinnslukona, landbúnaðarverkamaður, ritari í banka, innheimtufulltrúi, blaðamaður, dómritari, fréttamaður á sjónvarpi, borgarfulltrúi, borgarráðsmaður, kennari, skólameistari, rithöfundur, fræðimaður .... og sitthvað fleira. Nú er ég verkefnaráðinn sérfræðingur við Stofnun fræðasetra Háskóla Íslands hér á Ísafirði, stunda rannsóknir, kennslu og stjórnsýslustörf.

Hvar varstu um tvítugt og hvað varstu að gera þá? Þá var ég nýbúin að stofna fjölskyldu, átti unnusta og barn og bjó með þeim norður á Húsavík þar sem ég kenndi ensku í Gagnfræðaskólanum. Fór svo í Háskóla Íslands haustið eftir.

Hvað finnst þér skemmtilegast að gera? Syngja og dansa, lesa góða bók og eiga stund með fjölskyldunni.

Hvað finnst þér leiðinlegast að gera? Þrífa klósettið.

Æskuminning? Ég, sjö ára á hestbaki. Ríð við hlið pabba. Hann á Jarpi ég á Blesa - aukataumur á milli okkar. Mig langar að spreyta mig í reiðlistinni og bið pabba að taka aukatauminn. Mér til undrunar dregur hann tauminn til sín, og þar með er ég orðin ein við stjórn á hestinum. Blesi líður áfram á mjúku tölti, hlýðir taumhaldinu eins og hugur manns. Fjúkandi faxið leikur í fangi mér. Ég man enn lyktina af hestinum og hvernig sólin skein. Dásamleg tilfinning.

Af hverju býrð þú fyrir vestan? Hér er gott að vera þegar vel liggur á fólkinu.

Heldurðu að þú búir hér fyrir vestan eftir 10 ár? Veit ekki.

Ég er 43 ára gömul

Hvaðan ertu?
Ég er frá Alviðru í Dýrafirði, móðir mín Jóna Björk Kristjánsdóttir er sjötti ættliðurinn sem býr þar. Faðir minn Helgi Árnason er frá Húsavík. Það gæti útskýrt ýmislegt í fari mínu því það var sagt hérna áður fyrr að það fólk sem átti ættir að rekja bæði á Vestfirði og í Þingeyjarsýslu gæti verið erfitt viðureignar.

Hvar hefur þú átt heima um ævina?
Lífið hófst í Dýrafirði á sjúkraskýlinu á Þingeyri en fljótlega fór ég heim í Alviðru og bjó þar með foreldrum mínum, ömmu og systkynum þangað til skólagöngu á Núspskóla lauk. Þá lá leiðin til Ísafjarðar í Menntaskólan á Ísafirði, ég entist ekki lengi þar og eftir tvö ár elti ég þáverandi kærasta til Reykjavíkur fór í Menntaskóann við Sund. Ekki hélst mér allt of vel á honum og næst fann ég mig í Bonn í Þýskalandi, ég hafði ætlað mér að læra þýskuna betur, fara í þarlendan skóla og leggja stund á nám í kvikmyndatöku og kvikmyndastjórn. Þýskaland átti ekki alveg við minn karakter svo ég skrapp aftur heim til að hugsa málið. Áður en ég vissi var ég farin að búa með mínum ágæta manni Guðmundi Hjaltasyni á Ísafirði og hef búið þar síðan.

Við hvað hefur þú starfað um ævina?
Sem barn vann ég við almenn sveitastörf heima í Alviðru. Fyrsta launaða vinnan var líklega við þrif í Núpskóla, ætli ég hafi ekki verið tólf eða þrettán ára. Fljótlega eftir fermingu fór ég að vinna í fiski á Þingeyri í fríum og með skóla. Mér líkaði raunar aldrei að vinna í fiski, fannst lyktin vond, en tek ofan fyrir þeim sem vinna þessi störf. Eins og gengur vann ég í verslunum, sjoppum, hótelum í aukavinnu og sumarvinnu. Eftir stútentspróf fór ég að vinna í Landsbankanum í Austurstræti. Ég móðagðist við þá og sagði upp þegar ég komst að því að bankinn borgaði strákunum einhverjum aurum meira á tímann en mér. Næst vann ég sem bílsjóri hjá Meistaranum, sendist með kjöt, pissur, salöt, kjötvörur og þess háttar, það var gaman. Eftir Þýskalandsdvölina lá leiðin aftur vestur á firði. Ég ég byrjaði sem gjaldkeri í Landsbankanum á Ísafirði, því næst sem aðstoðarfjármálastjóri hjá Ísafjarðarbæ, þá tók við skrifsofustarf hjá Hafsteini Viljálmssyni. Árið 1999 tók ég við framkvæmdastjórastöðu hjá Snerpu og þar er ég enn.

Hvar varstu um tvítugt og hvað varstu að gera þá?
Tvítug var ég að útskrifast úr MS þeim, gleði og gæðaskóla, og vinna í Landsbankanum með Dr. Gunna, Ævari Erni, Hrafni Jökuls og fleiri góðum karakterum. Það voru skemmtilegir tímar. Ég bjó í lítilli íbúð í Njálsgötu ásamt Deddu vinkonu minni. Vann í bankanum í Austurstræti, drakk morgunkaffi á Hressó, keypti reyktan rauðmaga og döðlur í Vinberinu á Laugarvegi á leiðinni heim úr vinnu og hlustaði á Peter Green. Nú og svo var auðvitað djammað á Hótel Borg allar helgar.

Hvað finnst þér skemmtilegast að gera?
Það er svo margt skemmtilegt að ég hef stundum sagt að ég komist ekki yfir allt Það sem mig langar að gera í einu lífi. Líklega er þó skemmtilegast að skapa eitthvað, fá útrás fyrir listræna hæfileika. Í annað sætið set ég gönguferðir upp um fjöll og niður í fjöru. Nú og svo get ég ekki neitað því að mér finnst gaman í vinnuni.

Hvað finnst þér leiðinlegast að gera?
Heimilisstörf, önnur en eldamennska, finnast mér leiðinleg en ég læt mig þó hafa það stundum þó ég reyni að koma þeim á aðra á heimilinu.

Æskuminning?
Þegar ég var smábarn líklega tveggja ára var von á Gurru systir henna mömmu í heimsókn til okkar, hún bjó á Blönduósi, og átti að koma með flugi í Holt í Önundarfirði. Pabbi og mamma fóru að sækja hana í flug en ég varð eftir í sveitinni með eldri systrum mínum. Flugmaðurinn ákvað á síðustu stundu að breyta áætluninni og lenti vélinni á flugvellinum í Alviðru. Gurra var því komin heim langt á undan foreldrum mínum. Þær voru nokkuð líkar systurnar og ég hélt að mamma væri komin heim og fagnaði henni innilega. Það var ekki fyrr en alvöru mamman kom að ég áttaði mig á mistökunum. Ég er raunar ekki alveg viss hvort ég man þetta sjáf eða hvort ég man bara söguna, en ég man skömmustutilfinninguna enn.

Af hverju býrð þú fyrir vestan?
Mér finnst mjög gott að búa hér, samfélagið vinalegt og mikið menningarlíf. Við lifum í hægari takti en þeir sem búa í stærri borgum og krafturinn sem þetta litla samfélag býr yfir er ótrúlegur. Ef okkur dettur í hug að framkvæma stórviðburði gerum við það og notum tengslanet kunningja, vina og ættiingja til að finna rétta fólkið í hvert starf. Við gætum þó vel bætt við okkur nokkrum íbúum til að styrkja rekstargrundvöll þjónustufyrirtækja hér á svæðinu.

Heldurðu að þú búir hér fyrir vestan eftir 10 ár?
Ég á alveg eins von á því. 10 ár er þó langur tími og ég gæti svo sem alveg verið flutt til Króatíu þess vegna.

Hvaðan ertu?
Ég er fæddur og uppalinn á suðurfjörðum Vestfjarða nánar tiltekið á Bíldudal við hinn fagra Arnarfjörð.
 

Hvar hefur þú átt heima um ævina?
Fyrstu 25 árin á Bíldual og þar af nokkur veturmisseri fjarri heimahögum vegna náms. Fyrst í Reykjavík svo á Reykholti þaðan á Núpskóla í Dýrafirði. Loks voru heimahagarnir kvaddir árið 1995 en þá bjuggum við Billa, konan mín, ásamt tveimur dæturum okkar í Kaupmannahöfn í tvo yndisleg ár. Kíktum aðeins í borgina eftir það en fluttum svo endanlega aftur vestur aldarmótaárið og settumst að á Ísafirði.
 

Við hvað hefur þú starfað um ævina?
Hef nú föndrað við margt í gegnum tíðina einsog gengur. Byrjaði í unglingavinnunni á Bíldó fermingarárið mitt en þótti nú ekkert sérlega liðtækur þar enda með eintóma þumalputta sem henta nú lítið til garðyrkjustarfa. Sama má eiginlega segja um næstu djobb var óttalegur klaufi í frystihúsinu á Bíldó og í Rækjuveri. Botninn sló þó úr þegar ég var bæjarkall eitt sumar. Verkstjórinn setti mig í að slá Tunguna á Bíldó sem er einskonar listigarður en þar má finna minnismerki um Bíldudalsprinsinn Mugg og foreldra hans. Í lok dags hafði ég rúntað upp og niður tunguna en þegar litið var yfir blettinn var allt óslegið ennþá. Það voru víst engir hnífar í sláttuvélinni. Loks fékk ég vinnu við hæfi hjá mömmu og pabba á Vegamótum sem er einskonar sjoppa með öllu þar geturðu keypt allt frá skyndibita til kjötfars og sælgætis. Seinna opnuðum við hjónin kaffihúsið Langa Manga á Ísafirði og það var sko ævintýri. Mitt aðalstarf í dag er hinsvegar að leika mér.

Hvar varstu um tvítugt og hvað varstu að gera þá?
Ég var á Bíldudal og tuttugasta árið var alveg geggjað því þá fæddist fyrsta dóttir okkar hjóna hún Þórunn Sunneva. Þannig að ég var bara í pabbahlutverkinu milli þess sem maður tók vaktir á Vegmótum og starfa með Leikfélaginu Baldri á Bíldudal.
 

Hvað finnst þér skemmtilegast að gera?
Að leika og vera með familínunni í paradísinni okkar í Haukadal í Dýrafirði.

Hvað finnst þér leiðinlegast að gera?
Erfið spurning því mér finnst bæði gaman af því að vaska upp og brjóta saman þvottinn. En til að nefna eitthvað ætli það sé ekki að fljúga er ekkert voða spenntur fyrir flugvélum.

Æskuminning?
Við erum stödd á Bíldudal nánar tiltekið í garðinum hjá æskufélaga mínum Jóni Sigurði á Dalbraut 13. Það er nýhafinn æsispennandi leikur í ensku knattspyrnunni hjá okkur, Arsenal á móti Ipswich. Jón leikur markverðina báða en ég alla hina leikmennina auk þess að lýsa leiknum þar sem fyrirmyndin er auðvitað Bjarni Fel. Þetta er sko alvöru leikur við skokkum inná völlinn, hitum upp og svo er flautað til leiks. Æsispennandi nokkur mörk skoruð í fyrri hálfleik. Dómarinn, sem ég leik líka en ég var afskaplega ákveðinn í æsku og vildi alltaf leika aðalhlutverkið enda var pabbi aðalleikarinn á staðnum, og liðin þ.e. ég og Jón skokkum af velli og í búningsherbergi sem voru í kjallara hússins. Þar vorum við með vatnsbrúsa og súpuðum á honum. Auk þess sem við skráðum niður í leikjabókina hverjir hafi skorað mörkin hverjir fengið gult spjald eða rautt einhverjar hafa líka meitt sig og svona. Já þetta er eina bókhaldið sem ég hef verið góður í. Svo er flautað til leiks að nýju. Þannig er haldið áfram þangað til kallað er í kvöldmat og þá vorum við kannski búnir að afgreiða eitt keppnistímabil. Að sjálfsögðu var bikarinn afhentur í lokinn og það var sko flottur bikar eða stór plastblómapottur sem við nöppuðum frá mömmu Jóns Sigurðar.
 

Af hverju býrð þú fyrir vestan?
Hér líður mér best og hér er gott að skapa.

Heldurðu að þú búir hér fyrir vestan eftir 10 ár?
Já það vona ég. Við hjónin erum reyndar búinn að ákveða að vera í Haukadal í ellinni sem þá verður ennþá olíuhrein og flott.

Aldur
33

Hvaðan ertu?
Upprunalega frá Ólafsvík. Svo svona héðan og þaðan, en lít á mig sem Vestfirðing í dag.

Hvar hefur þú átt heima um ævina?
Úff, hvar á ég að byrja. Ég hef búið í Ólafsvík, Reykjavík, Bolungavík, Ísafirði og Arnardal. Síðan má telja til Reykjanes við Ísafjarðardjúp, Kaupmannahöfn og MV Silver Cloud.

Við hvað hefur þú starfað um ævina?
Ég gæti úffað aftur því það er ansi margt sem ég hef tekið mér fyrir hendur á lífsleiðinni. Ég hef unnið flest störf sem lúta að þjónustu við svanga og fulla. Ég hef migið í saltan sjó bæði sem háseti á frystitogara og þerna á lúxusskemmtiferðaskipinu Silver Cloud. Unnið sem viðburðastýra og haft umsjón með ferðum skemmtiskipagesta, líka tekið á móti sama fólki í gámnum góða á höfninni. Brugðið fyrir mig penna. Unnið með unglingum sem umsjónarkona félagsstarfs og sem ráðgjafi í Götusmiðjunni. Borið út blöð og póst í tveimur löndum. Brosað í afgreiðslu og sent fólki reikninga. Klætt fólk í og úr á kvikmyndasetti. Þetta er ekki tæmandi listi en ætti að gefa einhverja mynd af margbreytileika mínum.

Hvar varstu um tvítugt og hvað varstu að gera þá?
Um tvítugt var ég að hefja nýtt skeið í lífi mínu, hætti að vera partýljón og fór á enn meira flakk en ég hafði áður stundað.

Hvað finnst þér skemmtilegast að gera?
Dansa, næra andann og magann, fara í spa, vera utandyra, ferðast og njóta samvista við skemmtilegt fólk. Var nokkuð verið að spyrja um eitthvað eitt?

Hvað finnst þér leiðinlegast að gera?
Díla við hausinn á mér þegar hann hleypur með mig í gönur.

Æskuminning?
Við vinkonurnar, Gilitrutt eitt, tvö og þrjú á baddnó (Leikskólinn í Ólafsvík gekk iðulega undir því nafni). Við vorum ekki alltaf til í að fara að settum reglum og vorum ansi útsmognar þegar kom að því að fá það sem við vildum. Við vorum til að mynda ekki alltaf til í að vera úti þegar svo bar undir og ég minnist okkar í rólunum að pissa í buxurnar eftir miklar bollaleggingar um hvernig við gætum nú fengið að vera inni. Þetta virkaði í það minnsta í tvö skipti, síðan fóru fóstrurnar að sjá við þessu eins og öðru ráðabruggi og við fengum að vera hlandblautar úti, okkur til mikillar skammar. Þessi aðferð var því ekki notuð aftur.

Af hverju býrð þú fyrir vestan?
Yndislegt samfélag, gott fólk, þægilegt tempó, guðdómleg náttúra og það sem ég þarfnast innan seilingar.

Heldurðu að þú búir hér fyrir vestan eftir 10 ár?
Ég vil hvergi annarsstaðar vera og ætla mér að verða gömul í Arnardal ef guð lofar.

Hvaðan ertu?
Ísafirði

Hvar hefur þú átt heima um ævina?
Ísafirði , Breiðholti ,Kópavogi og Hafnarfirði

Við hvað hefur þú starfað um ævina?
Stuðningsfulltrúi, skrifstofublók , gengilbeina, rækju , flokkstjóri , símadama á Hreyfli og án efa eitthvað fleira, er í dag að láta æskudraum rætast og er búðarkona I Office 1

Hvar varstu um tvítugt og hvað varstu að gera þá?
Var á Ísafirði að bíða eftir erfingja númer 2

Hvað finnst þér skemmtilegast að gera?
Ætla að vera voða mjúk og í dag er það að upplifa heiminn með syninum og lesa

Hvað finnst þér leiðinlegast að gera?
Vaska upp og svo að vaska upp

Æskuminning?
Ég og Valborg frænka í fötum af mömmum okkar og man að draumurinn voru háhælaðir skór , redduðum hælum með því að teipa stóra lego kubba undir skóna svo var sparslað í andlitin með frjálsri aðferð og tekin spássitúr á Urðarveginum

Af hverju býrð þú fyrir vestan?
Gott umhverfi fyrir börnin að alast upp og okkur líður öllum vel hérna

Heldurðu að þú búir hér fyrir vestan eftir 10 ár?
Það er stefnan en þegar veðrið var sem verst í vetur fór ég að pæla í að vera bara búðarkona á Kanarí

Hvaðan ertu?
Ég er frá Ísafirði.

Hvar hefur þú átt heima um ævina?
Ég fæddist á Ísafirði, þá áttum við heima í Hrannargötu 4. Svo var það Kópavogur (Þverbrekka og Hlíðarhjalli), Vesturbærinn í Rvk, (Ránargata, Bræðraborgarstígur, Grandavegur), Barcelona (Aribau), Borgarnes (Hafnarstræti), Breiðholt(Völvufell, Síðufell), miðbær Rvk (Laugarvegur, Njálsgata, Bergstaðarstræti, Þórsgata, Ingólfsstræti, Frakkastígur), og svo aftur Ísafjörður, fyrst Grundargatan, svo Aðalstrætið og núna bý ég á Bjargi.

Við hvað hefur þú starfað um ævina?
Ég hef unnið við svo margt. Fyrsta "alvöru" vinnan mín var í sjoppu, svo hef ég unnið við ummönnun aldraðra, í fatabúðum, kaffihúsum, frystihúsi, bakaríi, við liðveislu....
Síðan ég kom vestur hef ég aðallega verið í unglingabransanum, þ.e starfað við Félagsmiðstöðina og sem ráðgjafi. Svo er ég auðvitað alltaf mamma.

Hvar varstu um tvítugt og hvað varstu að gera þá?
Um tvítugt varð ég "stór". Ég var nýbúin að eignast orm númer tvö og var eiginlega bara að æfa mig í því að vera "stór" allt það ár.

Hvað finnst þér skemmtilegast að gera?
Það er svo margt. Mér finnst eiginlega lang skemmtilegast að framkvæma það sem ég hugsa - oftast. Það verða oft til algjörir fjársjóðir þegar ég dett í framkvæmd. Svo næst á eftir því er að horfa á og skoða eitthvað sem aðrir hafa framkvæmt, eða jafnvel að framkvæma með öðrum. Það er eiginlega líka næstskemmtilegast.

Hvað finnst þér leiðinlegast að gera?
Mér finnst mjög leiðinlegt að mistakast.

Æskuminning?
hmmmm.
Staður: Fjarðarstræti 19, og fjaran sem var hægt að fara í beint frá ömmu
Stund: líklega júlí árið1989
Tilfinning: Endalaus sæla og tilhlökkun
Andrúmsloft: smá salt, gola, og keimur af þara.
Hljóð: öldur, einstaka bíll á veginum fyrir ofan og allt íeinu og uppúr þurru hundsgelt.

Af hverju býrð þú fyrir vestan?
Ég kom hingað í tvær vikur fyrir 5 og hálfu ári. Það var á föstudegi. Núna er ca. sunnudagur....

Heldurðu að þú búir hér fyrir vestan eftir 10 ár?
Já, það vona ég. Ég kannski skrepp í nám eitthvert í millitíðinni, en eftir 10 ár þarf ég að vera hérna, því ég verð ábyggilega bæjarstjóri...